Çempionat

04-06.10.2018 – 06.10.2018-ci il tarixlərdə Ukraynanın Kiev şəhərində “Ukrayna Kulinariya Birliyi” ictimai birliyi və Kiev Dövlət Ticarət-İqtisad Universiteti tərəfindən “BestCookFest – 2018” Beynəlxalq Restoran Texnologiyaları Festivalı keçirildi.
Bu tədbirdə tərəfimizdən 4 nəfərdən ibarət nümayəndə heyəti ezam edilmişdi (Ağa Aşurov – komandanın rəhbəri və münsiflər heyətinin üzvü, Timur Pivkin, Namiq Kazımov, Rəşad Davudov – komandanın üzvləri).
Tədbirdə 20 ölkə iştirak edirdi (Azərbaycan, Türkiyə, Səudiyyə Ərəbistanı, İslandiya, ABŞ, Böyük Britaniya, İsrail, Mavrikiy, Fransa, Albaniya, Xorvatiya, Malta, Serbiya, Şri-Lanka, Koreya Respublikası, Livan, Yunanıstan, Monqolustan, Polşa, Ukrayna)
Komandamız bu yarışlarda 9 fərdi, 1 komanda yarışında (cəmisi 10 sinif) iştirak etdi. Nəticədə, Timur Pivkin iştirak etdiyi “toyuq sinfi” fərdi yarışından qızıl, “balıq sinfi” fərdi yarışından gümüş, “ət sinfi” fərdi yarışından bürünc medal, Namiq Kazımov iştirak etdiyi “pasta sinfi” fərdi yarışından qızıl, “balıq sinfi” və “etnik sinif” fərdi yarışlarından gümüş medal, Rəşad Davudov iştirak etdiyi “toyuq sinfi” fərdi yarışından bürünc medal, “ət sinfi” və “pasta sinfi” yarışlarından isə fərqlənmə diplomu qazandılar. Bundan əlavə, Qran-Pri (qara qutu) yarışında komandamız 3-cü yeri tutaraq bürünc medal qazandı.
Beləliklə, 10 sinif yarışda cəmisi 2 qızıl, 3 gümüş, 3 bürünc medal, 2 fərqlənmə diplomu (4-cü yer) qazanıldı.
Münsiflər heyətində ölkəmizi usta-aşpaz Ağa Aşurov təmsil edirdi. Ukraynada keçirilən çempionatda iştirak xərclərini ” AA FOOD GROUP” və ” The Angus” Restoranı öz üzərinə götürdüyü üçün təşəkkür edirik.
Azərbaycan Milli Kulinariya Assosiasiyasının üzvü Ruslan Şıxıyev 08-12.10.2018-ci il tarixdə Makedoniyanın Strumica şəhərində keçirilən Beynəlxalq Kulinariya Çempionatında iştirak etdi
Azərbaycanı münsiflər heyətində və yarışlarda Ruslan Şıxıyev təmsil edirdi.
Ruslan Şıxıyev 3 qızıl və kubok qazanıb.

44167964_2268674526507232_7573378346285793280_o

“Təhsil alan gənc kulinarların II Respublika Çempionatı”

08.10.2018- 12.10.2018- ci il tarixlərdə Azərbaycan Dövlət Turizm Agentliyi Milli Kulinariya Mərkəzi, Peşə Təhsili üzrə Dövlət Agentliyi, Azərbaycan Milli Kulinariya Assosisiyasının dəstəyi ilə WACS-ın (World Association of Chefs’ Societies, Dünya Kulinariya Təşkilatları Birliyi) 90 illiyi münasibəti ilə “Təhsil alan gənc kulinarların II Respublika Çempionatı” keçirildi. Qeyd edək, çempionatda Peşə Təhsili üzrə Dövlət Agentliyinin 6 peşə məktəbi (Turizm və Sosial Xidmətlər üzrə Bakı Dövlət Peşə Təhsil Mərkəzi, Emal Sənayesi üzrə Bakı Dövlət Peşə Təhsil Mərkəzi, 18 nömrəli Bakı Peşə Liseyi, Qəbələ Dövlət Peşə Mərkəzi, Mədəniyyət və Sənətkarlıq üzrə Bakı Dövlət Peşə Təhsil Mərkəzi, İsmayıllı Peşə Tədris Mərkəzi və Bakı Turizm Peşə Məktəbi iştirak edib.
5 gün davam edən çempionatda dolma, aş, kabab, şirniyyat yarışları müvafiq olaraq 12 saylı peşə məktəbində, çay süfrəsi yarışları isə Bakı Turizm Peşə məktəbində baş tutdu.
Qaliblər çempionatın son günü elan olundu:

Qaliblər:
Plov yarışları:
I. Bakı Turizm Peşə Məktəbi
II. Turizm və Sosial Xidmətlər üzrə Bakı Dövlət Peşə Təhsil Mərkəzi (5 nömrəli Bakı Peşə Liseyi)
III. Mədəniyyət və Sənətkarlıq üzrə Bakı Dövlət Peşə Təhsil Mərkəzi (13 nömrəli Bakı Peşə Məktəbi)
Kabab yarışları:
I. Turizm və Sosial Xidmətlər üzrə Bakı Dövlət Peşə Təhsil Mərkəzi ( (5 nömrəli Bakı Peşə Liseyi)
II. İctimai İaşə və Xidmət üzrə Bakı Dövlət Peşə Təhsil Mərkəzi (18 nömrəli Bakı Peşə Liseyi)
III. Qəbələ Dövlət Peşə Təhsili Mərkəzi

Dolma yarışları:
I. İctimai İaşə və Xidmət üzrə Bakı Dövlət Peşə Təhsil Mərkəzi (18 nömrəli Bakı Peşə Liseyi
II. Bakı Turizm Peşə Məktəbi
III. İsmayıllı Peşə Tədrisi Mərkəzi

Şirniyyat yarışları:
I. Emal Sənayesi üzrə Bakı Dövlət Peşə Təhsil Mərkəzi(12 nömrəli Bakı Peşə Liseyi)
II. Mədəniyyət və Sənətkarlıq üzrə Bakı Dövlət Peşə Təhsil Mərkəzi (13 nömrəli Bakı Peşə Məktəbi)

III. Bakı Turizm Peşə Məktəbi

Çay süfrəsi yarışı:
I. İctimai İaşə və Xidmət üzrə Bakı Dövlət Peşə Təhsil Mərkəzi (18 nömrəli Bakı Peşə Liseyi)
II. Emal Sənayesi üzrə Bakı Dövlət Peşə Təhsil Mərkəzi (12 nömrəli Bakı Peşə Liseyi)
III. Turizm və Sosial Xidmətlər üzrə Bakı Dövlət Peşə Təhsil Mərkəzi ( (5 nömrəli Bakı Peşə Liseyi
Tədbirin ” Gran Prix” mükafatı Bakı Turizm Peşə Məktəbinə təqdim olundu.
Tədbirdə ” Astara düyü” şirkətinin yerli ağ və qara Astara düyülərindən, ” Qoç ət” firmasının halal və keyfiyyətli qoyun ətindən, ” A&A” FOOD qrupun mal ətindən, “İlğım” şirkətinin ədviyyalarından, ” Azərsun” holdingin ” Super Sun” və ” Möcüzə” yağlarından istifadə edilib. Tələbələrə ” Piza Hat” və ” The Angus” restoranları tərəfindən hədiyyələr təqdim olundu.

43788713_2259532804088071_6482790084297883648_o

43951565_2259533027421382_6898467168212484096_n

“İrəvan mətbəxi gününün keçirilməsi” layihəsi

5 oktyabr 2018-ci il tarixində Azərbaycan Respublikasının Prezidenti Yanında Qeyri-Hökumət Təşkilatlarına Dövlət Dəstəyi Şurasının qrant dəstəyi ilə “Xanədan”- etno restoranında (Bakı şəhəri, Ziya Bünyadov 43) “İrəvan mətbəxi gününün keçirilməsi” layihəsi baş tutdu. Tədbirə əsas təşkilati dəstəyi Azərbaycan Respublikası Dövlət Turizm Agentliyi vermişdir.
Tədbir saat 19:00-da Azərbaycan Milli Kulinariya Assosiasiyasının prezidenti, Azərbaycan Milli Kulinariya Mərkəzinin baş direktoru Tahir Əmiraslanov tərəfindən açıq elan olundu. Tədbirdə məruzəçi Tahir Əmiraslanov Azərbaycan mətbəxi və onun bir parçası olan İrəvan mətbəxi ilə bağlı fikirlərini söylədi:
“İrəvan, Göyçə, Zəngəzur… Bu adlar necə də doğma gəlir hər birimizə. İllər keçsə də el-obalarımız zorla didərgin salınıb bu yurd yuvalarımızdan köçsə də, tariximizi nə qədər bizə unutdurmağa çalışsalar da, Vətən hissi, Vətən həsrəti, bütöv Azərbaycan duyğusu min il də keçsə xalqımızın genetik yaddaşından silinməyəcək.
Biz İrəvan xanlığı bölgə mətbəxini digər bölgə mətbəxlərimizlə – Təbriz, Naxçıvan, Gəncə, Qarabağ, Şamaxı, Şəki, Ərdəbil və s. müqayisə etsək, görərik ki, İrəvan bölgə mətbəximiz digər bölgə mətbəxlərimizlə eyni ahəngdədir. Xörəklər, yeməklər, ərzaq adları, hazırlanma texnologiyaları, mətbəx ləvazimatları və alətləri, süfrələri, mətbəx folkloru, mətbəx, yemək adətləri, bayram mətbəxləri, ocaqları və s. ilə digər bölgə mətbəxlərimizdən çox da seçilmir. Öz mahiyyətinə və düşüncə tərzinə görə saz daha çox sevilən regionlarımızın mətbəxinə yaxındır. Mübaliğə etsək, İrəvan bölgə mətbəxi saz, aşıq mətbəxidir-deyə bilərik. Bu bölgəmizdə də müxtəlif təndir növlərinin, sacın, şişin aparıcı rolu daha qabarıq özünü ifadə edir. İrəvan mətbəxinin əsasında islam, müsəlman düşüncə tərzinin olduğu tam görünür. İrəvan mətbəxini Sultan Muradın aşpazı Mahmud Şirvaninin (XV əsr), Şah İsmayıl Xətainin aşpazı Bavərçinin (1521-ci il), Şah Abbasın aşpazı Usta Nurullahın (1590-cı il), Təbrizin valisi Nadir Mirzə Qacarın (XIX əsr). aşpazlıq risalələri və bu günkü mənbələrlə müqayisə etdikdə də biz İrəvan Xanlığı bölgə mətbəxinin ÜmumAzərbaycan milli mətbəxinin ayrılmaz tərkib hissəsi olduğunu görürük.”
Daha sonra söz Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası Katibliyinin İcraçı Direktoru Fərasət Qurbanova verildi. Tədbir Azərbaycan Dövlət Turizm Agentliyinin məsul işçisi Səkinə Əsgərovaçıxış etdi. Millət vəkili Ülviyyə Ağayeva, Azərbaycan Aşıqlar Birliyinin sədri Məhərrəm Qasımlının və başqa qonaqların çıxışı ilə davam etdirildi. Aşıqlar birliyindən Aşıq Altay “İrəvan çuxuru”, “Göyçə gölü”, “İrəvan mətbəx gülü” havalarını ifa etdi.
Peşəkar aşpazlar tərəfindən hazırlanmış, respondentlərdən toplanmış İrəvan mətbəxinə aid 25 çeşid xörək nüsxəsi (isti və soyuq qəlyanaltılar, I və II xörəklər):
1. Pörtləmə tərəvəz məzəsi
2. Payız məzəsi
3. Yer alması məzəsi
4. “Zəngi” balıq məzəsi
5. Şüyüdlü yaşıl paxla küküsü
6. İspanaqlı balıq küküsü
7. Qovurmali düyü şorbası
8. Qovurmalı mərci şorbası
9. Qovurmalı, əvəlikli əriştə şorbası (aşı)
10. Xan balığının üzüm yarpağına bükülməsi (xırda tikə şəklində)
11. İçi tərəvəzlə doldurulmuş xan balığı (Göyçə gölü balığı)
12. Sırf balığının (buxarda) suda tərəvəzlə bişirilməsi
13. Qora forel balığı müsəmməsi
14. Quzu əti ilə badımcan müsəmməsi
15. Quzu ətinin qiyməsindən mütəncəm
16. Dana ətindən şam közləməsi
17. İspanaqlı can əti qızartması
18. Qovurmalı, əvəlikli, paxlalı çəkmə aşı
19. Qovurmalı, ələyəzli xan aşı
20. Qovurmalı buğda aşı
21. Qatıq aşı
22. Toyuq xörəyi
23. Toyuq bozartması
24. Toyuq döyməsi
25. Toyuqla boranı müsəmməsi
Əlavə olaraq, İrəvan kətəsi, paxlava, mütəkkə şirniyyatları, limon, tərxun, reyhan, nar şərbəti hazırlanaraq, tədbir iştirakçılarına təqdim olundu.
Tədbir “Gənc Heydərçilər” Cəmiyyətinin sədr müavini Sarabəyim Sadıqzadə, Xidməti İş Həmkarlar İttifaqı Federasiyasının vitse-prezidenti Xəyyam Nəsibov, “Vətəndaşların Sosial Rifahı Naminə” İctimai Birliyin sədri İradə Rizazadə, “Prant” şirkətinin prezidenti Yusif Ələkbərov, Azərbaycan Dövlət İqtisad Universiteti “Qida Məhsulları Texnologiyası kafedrasının” dosenti Nüsrət Qurbanov, AMEA Geologiya İnstitutunun aparıcı elmi işçisi və Dissertasiya Şurasının elmi katibi Dilquşə Mirzəyeva, “Azzəfəran” və “MikTea” şirkətinin prezidenti Mikayıl Hüseynov, həkim-kardioloq, xalq təbabəti mütəxəssisi Seyfəddin Əsəd, Əməkdar jurnalist Rəhman Orxan, əməkdar mədəniyyət işçisi, usta-aşpaz Oruc Əliyevin İrəvan mətbəx mədəniyyəti haqqında olan çıxışları ilə davam etdi.
Tədbirin gedişatında usta-aşpaz Oruc Əliyevə, Gülnar Ələsgərovaya, Ziya Şahbazova, Xanədan restoranının işçilərinə və təşkilatçılara tədbirin təşkilində fəal iştiraklarına görə diplomlar təqdim olundu.
Tədbirdə yerli KİV-lər, səfirlər, millət vəkilləri, sahibkarlar, aşpazlar, assimilyasiyaya məruz qalmış İrəvan bölgə mətbəxi nümunələrinin toplanmasında birbaşa və dolayı yolla iştirak etmiş respondentlər və s. iştirak etdilər.
Ümumilikdə, isə 150 nəfər dəvətlinin iştirak etdiyi tədbir saat 21:00-dək davam etdi.
Tədbirdə ” Astara düyü” şirkətinin yerli ağ və qara Astara düyülərindən, ” Qoç ət” firmasının halal və keyfiyyətli qoyun ətindən, ” A&A” FOOD qrupun mal ətindən, “Nəbi oğlu” şirkətinin təmiz, ərinmiş kərə yağından, “İlğım” şirkətinin ədviyyalarından, “Miktea” şirkətinin təqdim etdiyi yerli Bilgə zəfəranlarından istifadə edildi.İrəvan mətbəxi axşamını həmçinin ” Top Tur” turizm şirkəti, “İnci” şirkətinin “Ofisait” və ” Onal” markaları, “Prant” şirkəti dəstəklədilər.
Hamıya dərin təşəkkürlərimizi ifadə edirik.

44213875_2264949830213035_1136096047534178304_n

44214733_2264949943546357_2442427672215683072_n

“Nomad Food”

Qazaxıstanın “Milli Aşpazlar Assosiasiyası” prezidenti Elena Maşinskaya tərəfindən 21-24.09.2018 tarixlərdə Qazaxıstanın Burabay bölgəsində keçirilən “Nomad Food” (köçəri mətbəxi) Beynəlxalq Kulinariya Çempionatı keçirilib.
Tədbirin əsas dəstəkləyicisi və maliyyə dayağı Akmola vilayətinin hakimiyyəti və Akmola hakimiyyətinin turizm idarəsi idi.
Tədbirin açılışında və bağlanışda Akmola vilayət hakimi Malik Mirzalin şəxsən iştirak etdi. Tədbir zamanı daimi olaraq yanımızda hakimin I müavini və turizm üzrə hakimin müavini iştirak edirdilər.
Tədbirdə 7 ölkə Qazaxıstan, Azərbaycan, Özbəkistan, Monqolustan, Serbiya, Rusiya və Rumıniya iştirak edirdi. Qazaxıstanın bir çox vilayətlərindən komandalar gəlmişdi. Çempionat peşəkarlar arasında ayrıca, gənclər arasında ayrıca keçirilirdi.
Tədbirdə Özbəkistanın, Qazaxıstanın səfiri də iştirak edirdi.Başda məşhur kulinar Akbar Umarov olmaqla Özbəkistan komandası 1000 (min) nəfərlik özbək plovu bişirib, payladılar.
Maliyyə imkansızlığı üzündən biz Azərbaycandan komanda aparmamışdığ.
Bu boşluğu doldurmaq üçün Şuçinsk şəhərində yerləşən, azərbaycanlıya məxsus “Ekspess” kafesinin Zöhrab müəllim Vəliyevlə görüş keçirildi. Adı kafe olsa da əslində, müəssisə çox böyük restoran idi. Yanında otelləri də var idi.
Kafenin işçilərindən 3 nəfərlik Milli komandamızı qurduq və 2 saat komandanın əsas aşpazı Cəfərov İmamverdi İmran oğlu ilə hazırlıq işləri apardıq. Əlbətdə ki, aylarla 3 nəfəri hazırlamalı olduğumuz halda 2 saat bir nəfəri hazırlamaq çox çətindi. Həm də aşpazın təhsilsiz olması işimizi ağırlaşdırırdı. Bizdən sonra isə İmamverdi Cəfərov digər 2 aşpaza da biz deyənləri başa salmalı idi. Zöhrab müəllim Vəliyev aşpazları, ərzaqları, yarış avadanlıqlarını, maşın və s. təmənnasız
ayırıb kömək etdi. Beləliklə, yarışlarda Azərbaycan peşəkar komandası kimi “Ekspress” kafesinin 3 aşpazı: Cəfərov İmamverdi, Qobeliya David və Belskiy Daniel iştirak etdi. Yarış üçün badımcan ləvəngisi, üzüm yarpağından dolma və forel balığı hazırlandı. Xörəklər dadlı olsa da onların dizaynı, süfrəyə verilməsi və təqdimatı yarış şərtlərinə cavab vermirdi. Buna görə də komandamızı yalnız sertifikatla mükafatlandırdılar.
Ikinci gənclər komandası bizim 2008-ci ildən əməkdaşlıq etdiyimiz Şuçinsk iaşə
“Tikinti-texniki kollecinin” tələbələrindən ibarət idi. Kollecin nəzdində olan iaşə texnologiyası fakultəsinin 3 nəfər tələbəsi; Bayramova Aydan, Siniçkina Anastasiya və Mukaşev Artur yarışlarda Azərbaycan mətbəxi xörəkləri ilə çıxış etdilər. Nəticədə gənclər arasında Artur Mukaşev sertifikat, Anastasiya Siniçkina bürünc medal, Bayramova Aydana isə qızıl medal qazandılar.
Gənclər komandasına da bizim xahişimizlə Zöhrab Vəliyev yardım etmişdi.
Kolleclə əlaqələrimizin inkişafı üçün yeni əməkdaşlıq müqaviləsini imzaladıq.
Bunlardan əlavə sərgi hissəsində diasporumuz tərəfindən Milli mətbəx süfrəsi qoyulmuşdu. Beləliklə, ölkəmizin adı münsiflər heyəti ilə, peşəkar komandalarla, gənclər komandaları ilə və diaspor süfrələri ilə birlikdə 4 mövqedə səsləndi.
Nəticədə, Azərbaycan adına 4 sertifikat, bir bürünc və bir qızıl medal qazanıldı. Münsiflərin azərbaycanlı üzvünə minnətdarlıq məktubu təqdim edildi.
Çempionatdan kənar, dünya kulinariyasına verdiyi tövhələrə görə Balıqlar bürcündəki bir ulduza azərbaycanlı kulinar Tahir Əmiraslanovun adının verildiyi açıqlandı və bu barədə sənəd Azərbaycan tərəfinə təqdim edildi.
Təşkilatçılara və iştirakçılara bizim tərəfimizdən də bir sıra mükafatlar, suvenirlər təqdim edildi.
Qazaxıstanda olduğumuz müddətdə daimi olaraq səfirliyimizin diqqət və qayğısını hiss etdik.
Şuçinsk şəhərindəki diaspora nümayəndəmiz, “Ekspress” kafesinin sahibi Zöhrab Vəliyev həm bizə çox diqqət və qayğı göstərdi, həm gənclər və peşəkar komandalarımızın formalaşmasına və təminatına böyük köməklik göstərdi.
Dəstəklərinə görə Azərbaycan Respublikası Dövlət Turizm Agentliyinə, Azərbaycan Respublikası Xarici İşlər Nazirliyinə, Azərbaycan Respublikası Diasporla İş üzrə Dövlət Komitəsinə minnətdarlığımızı bildiririk.

42694053_2231082366933115_407390928064479232_n

” III Qədim şəhərlər forumu”

Azərbaycan Milli Kulinariya Assosiasiyasının üzvü aşpaz Ruslan Şıxıyev 16.08.2018-18.08.2018 – ci tarixlərdə, Rusiya Federasiyası Ryazan bölgəsində ” III Qədim şəhərlər forumu” çərçivəsində qastronomiya festivalında iştirak edib. Festivalda Belçika, Yunanıstan, İspaniya, Peru, Özbəkistan, Estoniya və digər ölkələrin nümayəndələri iştirak edirdi. Ruslan Şıxıyev birinciliyi əldə edərək, tədbirin diplomu və kuboku ilə mükafatlandırılıb.
Ruslanı təbrik edir, yeni uğurlar arzu edirik.

39864437_2169865739721445_1827204878720565248_n

“Məngən Beynəlxalq Aşpazlıq və Turizm Festivalı”

03- 05.08.2018- ci il tarixlərdə Türkiyənin Məngən bölgəsində 33- cü “Məngən Beynəlxalq Aşpazlıq və Turizm Festivalı”-da Azərbaycan Münsiflər heyətində Azərbaycan Milli Kulinariya Mərkəzinin baş direktoru, Azərbaycan Milli Kulinariya Assosiasiyasinin Prezdenti Tahir Əmiraslanov, yarışlarda isə aşpazlar Emil Əliyev və Maksim Qolovin təmsil edirdilər.
Festival aşpazların paradı ilə başlandı.
Festivalın aşılışından sonra, yerli aşpazların əl işləri nümayiş olunub. Festivalda 1,5 ton toyuqlu əriştə yeməyi hazırlandı.
Məngən bələdiyyə başçısı bütün işlərdə şəxsən iştirak etdi.
Festivalın 2-ci gün Beynəlxalq Aşpazlıq Kuboku uğrunda yarışlar başladı.
Yarışda münsiflərə Azərbaycan sədrlik edirdi. Münsif qismində 9 ölkə (Azərbaycan, Türkiyə, Livan, Səudiyyə Ərəbistanı, Malayziya, Banqladeş, Serbiya, Bosniya Herseqovina, Misir) iştirak edirdi.
Beynəlxalq Aşpazlıq Kuboku uğrunda 9 ölkə (İordaniya, Qırğızıstan, Maldiv Respublikası, Fələstin, Ukrayna, Özbəkistan, Malayziya, Türkiyə və Azərbaycan) 9 ölkə yarışırdı.
2 nəfərdən ibarət hər komandaya bağlı qutu verildi (qara qutu yarışması). Qutuda nə olduğundan komandaların xəbəri yox idi. Start verildikdən sonra komandalar qutudan çıxan ərzaqlar əsasında 20 dəqiqə ərzində 3 xörəkdən (açar, əsas və desert yeməyi) ibarət menyu və reseptləri verməli idilər. Sonra isə 1 saat ərzində hər 3 yeməkdən 3 pay süfrəyə qoymalı idilər.
Hər bir yemək beynəlxalq 100 ballıq sistemlə dəyərləndirilirdi.
Münsiflərin 3 nəfərdən ibarət birinci qrupu yalnız açar yeməkləri, ikinci qrup əsas yeməkləri, üçüncü qrup isə desert yeməkləri dəyərləndirirdi. Qruplar sonra orta qiymətləri sədrə və protokola təqdim edirdilər. Heç bir münsif öz ölkəsinə qiymət verə bilməzdi.
Nəticədə, birinci yeri, qızıl medalları və kuboku Azərbaycan komandası, ikinci yer və gümüş medalları Malayziya komandası, üçüncü yeri və bürünc medalları Özbəkistan, dördüncü yeri isə Maldiv Respublikasının komandası qazandı.
Türkiyənin ilk aşpazlıq məktəbi 1985-ci ildə Məngəndə (Boluda) yaradılıb. Uşaqlar 11 yaşından qəbul edilib və 7 il aşpazlıq dərsləri alıblar.
32 kulinariya yarış festivalları Məngəndə ölkə daxili keçirilib. Yalnız bu il yarışlar beynəlxalq xarakter alıb.
Şəhərin girişində dünyada ən böyük aşpaz heykəli qoyulub. Türkiyənin Məngən bölgəsi də digər bölgələr kimi aşpazlıqla bağlı öz aralarında rəqabət aparır. Məngən Gaziantepdən sonra indi dünyanın aşpazlıq mərkəzi adına iddialıdır.
Bölgə turizm bölgəsi deyil və otellər də yoxdur. Lakin keçmiş baş nazir Tansu Çillərin “Türkiyəni dünyada türk mətbəxi tanıdacaq” şüarından sonra Türkiyədə bu sahəyə çox böyük diqqət yetirilir, böyük vəsaitlər qoyulur.
Bu da turizmdə öz nəticəsini verir. Tədbirdə yalnız yerli jurnalistlər və TV-lər iştirak edirdilər.
” Super Sun” yağlarının istehsalçısı ” Azərsun Holding” şirkətinə verdiyi dəstəyə görə təşəkkür edirik.

38851140_2146007318773954_3057850667021369344_o

” Маэстро”

Azərbaycan Milli Kulinariya Assosiasiyasının idarə heyətinin üzvlərindən Ziya Şahbazov, 06.08-07.08.2018 – ci il tarixlərdə Rusiya Federasiyası Yekaterinburq şəhəri ” Маэстро” mərkəzi tərəfindən təşkil olunan baş aşpazların toplantısında iştirak edib.
Digər tanınmış aşpazlarla birlikdə mütəxəssislər üçün keçirilən usta siniflərdə Ziya Şahbazov Azərbaycan mətbəxi üzrə yüksək səviyyəli usta siniflər keçib və aşağıdakı milli yeməklərimizi hazırlayıb və təqdim edib.
 tərəvəz və qoyunun can ətindən hazırlanan sac xörəyi.
 sarımsaq və ədviyyatlarla hazırlanan qoyun qəfəsi
 qrildə bütöv qoyun
 tərəvəz və ətirli otlarla doldurulmuş bütöv qoyun budu.

Sonda Ziya Şahbazov diplomla təltif olunub.

” Super Sun” yağlarının istehsalçısı ” Azərsun Holding” şirkətinə verdiyi dəstəyə görə təşəkkür edirik.

39026901_2146005298774156_1085590758301368320_n

Konqress

09-16.07.2018 tarixlərdə Malayziyanın Kuala-Lumpur şəhərində keçirilən Dünya Kulinariya Konqresində iştirak etmiş AMKM nümayəndə heyətinin
HESABATI

11.07.2018 tarixdə saat 8:30-da Konqres öz işinə başladı.
Konqresi Malayziya Kulinariya Təşkilatının Prezidenti Cənab Kamaruddin Adnin açdı. Ondan sonra Malayziya Mədəniyyət və Turizm Naziri Mohammadin Bin Haji Ketapi çıxış etdi.
Daha 6 ölkə (Boliviya, Qana, Panama, Tonqa Krallığı, Papua-Yeni Qvineya, Estoniya) WACS-a üzvlüyə qəbul olundu. WACS-ın 90 illik fəaliyyəti ilə bağlı məruzə edildi.
Diqqət çəkən məqamlardan biri o idi ki, Ermənistanın WACS-da 26 ildir ki, qarşısını aldığımızdan WACS-a üzv olmaq üçün çox ciddi addımlar atır.
2015-ci ildən maliyyədə çətinliklər ilə bağlı Azəbaycanın xarici tədbirlərdə iştirakı azalmış, komandanın üzvlərinin sayı minimuma endirilmişdir. Bunu anlayan Ermənistan səylərini artırmışdır. Bizim iştirak edə bilmədiyimiz tədbirlərə Qətərdən, İsraildən və s. mütəxəssisləri soxulur. Başqa ölkələrdən gəlsələr də onlar Ermənistan bayrağı altında çıxış edir, WACS-ın üzvlərini və rəhbərliyini müxtəlif yollarla ələ almağa çalışırlar. Privat görüşlərdə isə Ermənistanı təbliğ edir, Ermənistanı WACS-a gətirmək üçün yol açırlar. Bu dəfə də Qətər nümayəndə heyətinin tərkibində Livan vətəndaşı, Qətərdə çalışan erməni xanım gəlmişdi. O artıq 3 ildir ki, aktiv şəkildə Qətər, Livan vasitəsi ilə WACS-a salınıb və Ermənistanı WACS-a salmağa çalışır. Iştirakçıları aktiv çalışır, bahalı hədiyyələr Ermənistan adına paylanırdı.
Lakin bu dəfə də qarşıları alındı. Amma bizim maliyyə imkanlarımızla onlara qarşı durmaq getdikcə ağırlaşır.
Onlar istədiklərinə çatsalar, mübarizə, mətbəximizin müdafiəsi çətinləşəcək və əks təbliğat üçün milyonlarla vəsait belə azlıq edəcək.
Tədbirin axırıncı günü Qala axşam yeməyində Livan vətəndaşı və Qətər nümyəndə heyətinin üzvü kimi gəlmiş Ermənistanı WACS-a salmağa çalışan xanım bizə yaxınlaşdı, bizə şəxsi sevgisini izhar elədi və soruşdu ki, (Qətər və Livan Kulinariya Təşkilatları Prezidentlərinin yanında) niyə biz Ermənistanı buraxmırıq dünya proseslərinə. Biz izah etdik və Ermənistanı yenə buraxmayacağımızı başa saldıq. Onun Livan vətəndaşı olduğunu, Qətərdən gədiyini bu ölkələrin vasitəsi ilə Ermənistanı təmsil etməyə çalışmasının qeyri-qanuni və qeyri-etik olduğunu başa saldıq. Ətrafdakılar da bizimlə razılaşdı.
Konqresdə üzv ölkələrin 90% -i iştirak edirdi (115 üzv ölkə var). Bu ölkələrdən 1000 (min) nəfərdən artıq mütəxəssis edirdi.
Konqresdə çıxış edən Malayziya Mədəniyyət və Turizm Naziri açıqladı ki, 30 milyon əhalisi olan Malayziyaya 28 milyon turist gəlmişdi və onların hədəfi 2020-ci ilə 36 milyon turistdir.
Malayziya büdcəsinin 60%-dən çoxunu turizm sənayesi formalaşdırır.
Nazirliyin dediyinə görə turizmin ümumi qazancının 20%-dən çoxunu yemək-içmək, mətbəx formalaşdırır. Ona görə də təhsil, mətbəx bu sahənin inkişafı, xüsusilə kadr hazırlığı ən çox vəsait qoyulan sahələrdəndir.
Milli mətbəxin təbliğatı ilə bağlı çıxış edən Erik Olmede məruzəsinin əsas tezisləri:
1. Mətbəxin təbliği ölkənin təbliğində, imicinin, o cümlədən turizm formalaşmasında əsas, başlıca faktordur.
2. Beynəlxalq əlaqələrdə milli mətbəx ən güclü təsir vasitəsi kimi çıxış edir və ölkənin imicini formalaşdırır.
Məruzəçi Cənab Olmede bu təbliğatın yalnız elmi-tarixi araşdırmalar əsasında mümkün olduğunu açıqladı və söylədi ki, aşpaz kütləsinin bu təbliğatı aparmaq gücü, bilgisi və bacarığı yoxdur. Aşpazların mətbəx tarixi və onun təbliğində heç bir motivləri yoxdur. Onlar yalnız bişirməyi və qazanclarını düşünürlər. Buna görə də tarixçilər, etnoqraflar və s. mütəxəssislər bu işir görməlidirlər.
Təhsil komissiyasının hesabatında artıq dünyada 80 ölkədən peşə kulinariya məktəbinin WACS-ın akreditasiyasını aldığı göstərildi.
Təəssüflə qeyd etməliyik ki, Azərbaycanda heç bir peşə məktəbi bu prosesə hazır deyil.

Növbəti müzakirə məsələsi tullantıların idarə edilməsi ilə bağlı oldu.
Sponsor firmaları Nestle, Dilmah, Dick və s. təqdimatları keçirildi.
BMT-nin qida proqramı “Həyatları xilas edək, həyatları dəyişdirmək, bizim missiyamız insanları yedirtməkdir” humanitar proqramdır.
Təyyarə at, uzunqulaqla yemək ehtiyacı olanlara BMT yemək daşıyır. 83 ölkədə, 80%-i müharibədədə hər gün 5000 maşın qida ilə, 20 gəmi, 92 təyyarə yola düşür.
Lakin dünyada hər gün hazır yeməyin 1/3-i atılır.
Itirilən yeməyin 25%-i istifadə edilsəydi aclıq sona yetərdi, dünyada ac qalmazdı.
Restoran və kafelərdə hazır yeməyin 25% itirilir, tullantıya gedir.
Söylənildi ki 30 ildən sonra yemək problemi artacaq.
Ildə dünyada 800 milyon adam ac qalır.
Fransada qanunla istifadə edilmiş, satılmamış ərzağı supermarketlərə atmaq qadağan edilib. Bu ərzaq pulsuz ehtiyacı olanlara göndərilir.
Milli mətbəx irsi komissiyası hesabatında da milli mətbəx sahəsində yeni tədqiqatların, yeni elmi araşdırmaların aparılmasına ehtiyac duyulduğu söylənildi.
2020-ci ildə növbəti Konqresin keçiriləcəyi Sankt-Peterburqun hazırlığı barədə məlumat verildi.
Kontinent direktorlarının yeni seçkisi keçirildi.
2022-ci ildə Konqresin keçiriləcəyi yerlə bağlı Avstraliya (Sidney) və BƏƏ (Abu-Dabi) arasında mübarizə getdi. Səs çoxluğu ilə 2022-ci ildə Konqresin məhz Abu-Dabidə keçirilməsi qərara alındı.
Konqresdə iştirakımız zamanı nümayəndə heyətimiz daimi olaraq Malayziyadakı səfirliyimizin qayğısı və diqqəti altında oldu.

37383552_2101118253262861_5465486428374827008_n

III Beynəlxalq Kulinariya Çempionatı

08-11.05.2018 tarixdə Sloveniyanın Krajinska Gora şəhərində III Beynəlxalq Kulinariya Çempionatında Azərbaycan Milli Kulinariya Mərkəzinin baş direktor müavini Ceyran Əsgərovanın rəhbərliyi ilə milli kulinariya komandamız iştirak edib.
Qeyd edək ki, “Krajinska Gora – 2018 ” Sloveniyanın 3-cü dəfə keçirilən ən mötəbər kulinariya yarışlarından biridir. Bu yarışda 15 ölkədən (Mavritaniya, Mərakeş, Xorvatiya, Rumıniya, Serbiya, Sloveniya, İtaliya, Türkiyə, Slovakiya, Makedoniya , Bosniya Hersoqvinya, Macarıstan, Səudiyyə Ərəbistanı, Bolqarıstan, Avstriya) 400-dən çox aşpaz iştirak edirdi. Münsiflər heyətində Mavritaniya, Mərakeş, Xorvatiya, Rumıniya, Serbiya, Sloveniya, İtaliyadan, olan münsiflər iştirak edirdi.
Yarışmanın ilk günü aşpazlar Cavadov Seymur və Babayev Nicat 46 digər ölkə aşpazları ilə birlikdə milli mətbəx sinifində yarışa başladı. Aşpazlarımız bu yarışda 1 qızıl və 1 gümüş medallar qazandı.
Yarışmanın ikinci günü Cavadov Seymur və Babayev Nicat müasir mətbəx sinifində iştirak etdilər. Cavadov Seymur qızıl, Babayev Nicat isə gümüş medallar qazandılar.
Cavadov Seymur 2 qızıl medal qazandiği üçün finala çıxan 4 iştirakçıdan biri oldu və qara qutu yarışmasında iştirak etdi. Azərbaycan finaldaikinci yerə çıxaraq Çempionatın 2-ci yer kubokunu qazandı.
Babayev Nicat çempoinatın ən gənc və kreativ peşəkar aşpazı kimi kuboka və diploma layiq görülmüşdür.
Beləliklə komandamız 5 yarış sinfində 5 nəticə (2 qızıl, 3 gümüş) göstərdi.
Tədbir zamanı Sloveniyadakı diplomatik nümayyəndəliyin rəhbəri Orxan Hacıyev yarış yerinə gələrək komandamıza dəstək oldu. Tədbir bitdikdən sonra, komandamız Orxan Hacıyevin təşkilatçılığı ilə Lyublyana şəhərində yerləşən diplomatik nüməyyəndəliyi və Çepovan kəndində Mehdi Hüseyinzadənin məzarını ziyarət etdi.
Göstərdiyi köməyə görə, Azərbaycan Milli Kulinariya Mərkəzi Mədəniyyət Nazirliyinə, “Azərsun Holding”- in ” Super Sun” yağlarına öz minnətdarlığını bildirir.

32394193_1708458859189924_3713189692011708416_n

32212714_1690567010990840_5788469721380683776_n

“İpək yolu mətbəxi” Festivalı

Azərbaycan aşpazları Abdulla Əmiraslanov və Rövşən Qəniyev, Milli Kulinariya Mərkəzinin baş texnoloqu Gülnar Ələsgərovanın rəhbərliyi ilə 30.04.2018 tarixində İranın Zəncan şəhərində keçirilən “İpək yolu mətbəxi” Festivalında iştirak edib.
Festivalda 10 ölkə (Azərbaycan, Tacikistan, Pakistan, Suriya, Özbəkistan, Çin, Türkiyə, Lübnan, Yəmən, Iran) iştirak edirdilər. Tədbirin açılışında Zəncanın məmurları, Azərbaycanın Tehrandakı konsulu da iştirak edirdilər. Saat 16:00-da yeməklər hazır olurdu, festivala insanlar gəlirdi. Festivalın 1- ci günü kulinarlar Azərbaycan xörəklərindən ( buğlama, lavaşarası dürmək, atılama, təvəz salatı, çöpdə kabab ) hazırlayıblar.
02.05.2018- 03.05.2018 tarixlərində quzu qovurması, tərxun şərbəti, çoban salatı,qazan kotleti, koroğlu kababı, limon şərbəti, Bakı salatı toyuq çığırtması hazırlanıb.
03.05.2018 tarixdə tədbirin sonunda iştirakçıların mükafatlandırma mərasimi keçirildi. İştirakçılara diplom və tədbirin kuboku təqdim edilib.

31964175_1984502378257783_7753028959897387008_n